Psalms 146
Ripet Rat His Iahova xa Di Miteh Meulien e Xir
1!Ripet rat his Iahova!!Inou ti nipet rat hisen!
2Inou ti nisa memesien mini e melengien xil xa di nameul nada.
Io, nipet rati itel kikeien navan xil.
3Munaling ti nenesien namim nati e vat xil te ut etan,
vengan xa moletin ti misakras vateh meulien e xamim.
4Melele xa xil lamat, litilomun lihe tan,
e holesok xil vus xa laling xati tengan lipol ni mei ituxoh hoxalite teni.
5Sien iti mi ngan xil xa Hi na Siekob di dutou ni xil,
mi ngan xil xa di laling nenesien nae iti e Iahova, Hi nae.
6Vengan xi iaxa tepeas ni ut nesao, ut etan, tas, e holesok xil vus mun xa ladi e xatel.
Xi di pol vuol ni hitxatien nan xil.
7Xi iaxa di pol ni naha xa momal tengan istal e meulien na ngan xil xa mosav xil di lapangei.
Xi di misa anien mi ngan xil xa mae nggat xil.
Iahova di maen ngan xil xa ladi pe he mosav xil
tengan ha vexil imase.
8Ngan xil xa mete bar,
Iahova misak ni laketeh rilomun.
Iahova di dal rat ngan xil xa langgur holesok xil xa meas pupu e meulien nae.
Xi ien bei ngan xil xa sexien nae momal.
9Iahova di misikoe xol ngan xil tahal rute sav,
e di dutou ni tunau e timaru xil.
E ngan xil xa lasa,
xi di pangei xil.
10Ngan xil xa mudi e Vathu Saeon, Iahova ilaxat xamim vehakut.
Io, ilaxat kuh xamim itel vatimol namim xil mun xa ti imei itutou.
!Ma ripet rat his Iahova!
Copyright information for
TVK